ماني مفسـر غيابـك ملتهـي عنـي
ما اظن لـو تلتهي جفـواي تهنا لك
لا لا تحـاول تبـرر منـت مقنعنـي
عارف سبايب غيابك.. وش على بالك؟
وإذا بتسـأل بحالـك وش معرفـني
جسر التواصل مابين أرواحنـا سالك
روحك تشكت وجت روحـي تخبرني
عن شهقة أنفاسك اللي خـوف تغتالك
فجـر شهيقـك وعاتبنـي وأنبني
بس لا تخلي السكوت يصيـر موالك
لك حق كونك أخذت بخاطـرك مني
ولك حق تشره علـي وتبـدي أقوالك
جمعت عذري وأثاري العذر ما يغني
واسقيت خدي دموع العين .. مع ذلك؟
دوك الخناجر وهاك القلب واجرحني
بس لا تجرح مكـان بخافقـي شالك
وإذا تبي شي أكثـر يالغضي بعني
والله لا اجيلك برجلي واشري وصالك
أنـت البحـر كنـك وسحابـة كني
مهما انجلي مرتوي أعود لـك هالك
شف قلبي اللي معـك أقفـى مودعني
شف خطوتي دون شوري جتك تسعالك
عاتـب وجـرح ولكـن لا تقاطعني
مد الوصل .. لا تشح بطويـة حبالك
لا رن جوالي أدعي ربي يسعدني
عساني أقرا بجهازي رقـم جوالك
تبي عذر؟ دوك قلبي .. وش تبي يعني؟
وإن ما تقبلت عذري(ما هو أشوى لك)..!
موضوع: ख़ღعاتـب وجـرِّح ولكـن لا تقاطعنـيღख़ 
